Smartland Mörtu Maríu | Heimili og hönnun | mbl | 24.7.2024 | 6:00

498 fm lúxushöll með bíósal og vínherbergi í Garðabæ

Óskað er eftir tilboði í húsið. Samsett mynd

Við Votakur í Garðabæ er að finna glæsilegt 498 fm einbýlishús á tveimur hæðum sem reist var árið 2014. Húsið er fallega hannað bæði að innan og utan, en það státar meðal annars af bíósal, líkamsrækt og vínherbergi.

Aukin lofthæð og stórir gluggar gefa eigninni mikinn glæsibrag. Í stofunni má sjá fallegann arinn sem setur svip sinn á rýmið og skapar notalegt andrúmsloft, en við arinninn stendur hinn formfagri Mammoth-hægindastóll sem Rune Krøjgaard og Knut Bendik Humlevik hönnuðu árið 2011 fyrir NORR11.

Stofan er björt og opin. Ljósmynd/Af fasteignavef mbl.is

Bíósalur, líkamsræktar- og vínherbergi

Frá stofunni er útgengt á afar snyrtilegan sólpall um stóra rennihurð. Þar hefur heitum potti, sauna húsi og útisturtu verið komið fyrir ásamt grill- og setuaðstöðu.

Á neðri hæðinni er meðal annars að finna líkamsræktarherbergi, bíósal, vínherbergi og þvottahús. Alls eru fimm svefnherbergi og þrjú baðherbergi í húsinu.

Óskað er eftir tilboði í húsið, en fasteignamatið er 318.450.000 krónur og brunabótamatið er 199.950.000 krónur.

Sjá á fasteignavef mbl.is: Votakur 1