Sigríður Halldórsdóttir fjölmiðlakona á Rúv og fyrrverandi aðstoðarmaður ráðherra og Jón Ragnar Ragnarsson slökkviliðsmaður hjá Slökkviliði höfuðborgarsvæðisins hafa sett fallega íbúð sína á sölu. Um er að ræða 118 fm efstu hæð í reisulegu húsi við Rauðalæk sem byggt var 1958. Úr íbúðinni er heillandi útsýni. 

Heimili þeirra Sigríðar og Jóns er persónulegt og skemmtilega innréttað. Í eldhúsinu er upprunaleg innrétting sem búið er að gera upp með nýjum borðplötum og nýjum svörtum flísum. Í eldhúsinu er eldhúskrókur sem hefur að geyma tímalaus klassísk stálhúsgögn og einn rauðan málaðan tréstól. Á veggjunum eru allskonar skemmtilegar myndir sem ríma vel saman. 

Stofa og borðstofa eru í sameiginlegu rými og þar setur risastór Monstera svip sinn á heimilið. Það er augljóst að Sigríður og Jón eru með græna fingur. Í borðstofunni eru litríkir stólar sem fara vel við tekkborð og tekkskenk og ljós í gamaldags stíl. 

Baðherbergið í húsinu var nýlega gert upp með nýjum ljósgráum flísum, hringlaga spegli og brass-blöndunartækjum. 

Sjá nánar á fasteignavef mbl.is: Rauðalækur 69