Einbýlishúsin í Fossvogi í Reykjavík eru eftirsótt. Í lok febrúar var eitt slíkt auglýst til sölu við Kvistaland. Um er að ræða 231,1 fm einbýli sem reist var 1980.
Húsið er á hægri hönd þegar keyrt er inn Kvistalandið og í kringum húsið er skjólgóður og stór garður sem vel hefur verið hugsað um.
Í húsinu, sem er á einni hæð, má finna anddyri, gestasalerni, stofu, borðstofu, eldhús, fjögur svefnherbergi, þvottahús, geymslu og bílskúr.
Ásett verð var 210.000.000 kr.
Nú hefur húsið verið selt á 202.000.000 kr. Kaupendur hússins eru Freyr Pálsson verkefnastjóri hjá Vegagerðinni og Lóa Bára Magnúsdóttir markaðsstjóri Origo. Þau keyptu húsið af Guðmundi Arasyni og Margréti Sigurðardóttur.
Kaupin fóru fram 24. júní og var húsið afhent 24. ágúst.
Smartland óskar Frey og Lóu til hamingju með húsið!