Lögmaðurinn Steinbergur Finnbogason og eiginkona hans, Hrafnhildur Valdimarsdóttir, hafa sett heillandi einbýli sitt í Breiðholtinu á sölu. Parið festi kaup á húsinu 2018 og síðan þá hefur nánast allt verið endurnýjað hvað varðar innréttingar, gólfefni, baðherbergi og þar fram eftir götunum. Í þessum takteringum var garðurinn ekki skilinn útundan og hann snyrtur og lagaður heilmikið. Húsið er 209 fm að stærð og var reist 1971. 

Húsið var eins og leikmynd í Mad Man sjónvarpsþáttunum þegar Steinbergur og Hrafnhildur keyptu það. Þar voru grænar flísar, blá gólfteppi og grænar formæka-innréttingar í eldhúsinu. Þau keyptu húsið á 73.500.000 kr. en nú er ásett verð 168.900.000 kr. 

Arkitekt fenginn í málið 

Valdimar Harðarson arkitekt endurhannaði breytingarnar á húsinu og var tekið tillit til upprunalegrar hönnunar hússins. Kjartan Kjartansson arkitekt teiknaði það á sínum tíma og var hönnun hans sýnd virðing þegar farið var í endurbætur. 

Í eldhúsinu eru eikar-innréttingar með gripum og gott skápapláss. Efri skápar eru opnir að hluta til sem létta á eldhúsinu þar sem það er í sérherbergi og ekki galopið inn í stofu. 

Borðstofan nú og þá 

Húsið er hannað þannig að gott skjól myndast á útisvæði í garðinum. Stórir gluggar í borðstofu hleypa birtinunni inn og sjarmi áttunda áratugarins fær að njóta sín. Í dag er borðstofan flísalögð með fallegum ljósgráum flísum en áður var blámunstrað teppi á gólfinu. 

Nýtt baðherbergi

Þegar Steinbergur og Hrafnhildur keyptu húsið voru baðinnréttingar úr furu í húsinu, grænar flísar og grænt baðkar. Nú eru hvítar sprautulakkaðar innréttingar í húsinu og baðkarið hefur vikið fyrir sturtu. 

Sjá nánar á fasteignavef mbl.is: Fornistekkur 16