Smartland Mörtu Maríu | Heimili og hönnun | mbl | 15.9.2024 | 18:00

Langar þig að búa í Undralandi?

Húsið stendur á fallegum stað í Reykjahverfi í Mosfellsbæ. Samsett mynd

Á fallegum stað í Reykjahverfi í Mosfellsbæ er að finna heillandi endaraðhús á tveimur hæðum sem kallast Undraland. Húsið var reist árið 1989 og telur alls 244 fm, en það hefur verið mikið endurnýjað á undanförnum árum.

Á neðri hæðinni eru eldhús, stofa og borðstofa samliggjandi í björtu og opnu rými. Fallegur ljós efniviður á gólfi og í loftum gefur rýminu skandinavískt yfirbragð ásamt bitum í lofti. Þá skapa stórir gluggar sjarmerandi stemningu.

Eldhúsið er bjart og opið. Ljósmynd/Af fasteignavef mbl.is

Á gólfum eru olíuhvíttaðar furufjalir. Ljósmynd/Af fasteignavef mbl.is

Áferð og litapalletta innblásin af náttúrunni

Í eldhúsinu er stílhrein hvít innrétting með góðu vinnu- og skápaplássi ásamt rúmgóðri eldhúseyju. Rýmið er afar bjart og opið, en þaðan er útgengt á góðan sólpall um sérlega fallega tvöfalda hurð.

Í stofunni hefur kalkmálning verið notuð á einn af veggjunum sem gefur rýminu skemmtilegan karakter, en áferð og litapalletta úr náttúrunni eru í forgrunni í eigninni. Gengið er upp á efri hæðina frá stofunni um sérsmíðaðan stiga.

Alls eru fjögur svefnherbergi og tvö baðherbergi í húsinu. Ásett verð er 99.900.000 krónur.

Sjá á fasteignavef mbl.is: Undraland