Arkitekt selur vel hannað raðhús í Garðabæ

Baldur Svavarsson arkitekt á Úti Inni arkitektastofunni hefur sett sitt einstaka raðhús í Garðabæ á sölu. Húsið var reist 1974 og er 206 fm að stærð. 

Baldur hefur hlúð vel að húsinu í gegnum tíðina og er búið að skipa um eldhúsinnréttingu og taka baðherbergi í gegn. Heimilið er arkitektalegt og veitir fólki, sem elskar Cassina-tímabilið í kringum 1980, taumlausan innblástur. Að sjá þessa samsetningu á sófum, sófaborðum og listaverkum gleður augað. 

Látlausar innréttingar sem trufla ekki húsgögnin 

Í eldhúsinu eru látlausar hvítar sprautulakkaðar innréttingar með þunnum borðplötum. Eldhúsið er mjög stílhreint og flæðir á áreynslulausan hátt út í horn og inn í önnur rými. Eldhússkáparnir flæða yfir í stofuna og er hugsun á bak við röðun á skápum. Þar er pláss fyrir DVD-myndir og fleira sem gerir heimili að heimili. Þegar horft er inn í eldhús úr stofunni þá er ekkert sem truflar augað og er innskotið með ljósu hillunum vel heppnað.

Cassina-elskendur taka andköf 

Stofan er æði. Þar er að finna sófa og stóla eftir Vico Magistretti sem komu á markað 1983 hjá ítalska húsgagnamerkinu Cassina. Þar er líka glerborðið Tavolo con Ruote eftir Gae Aulenti sem fæst hérlendis í Casa eins og önnur húsögn frá Cassina. Samspilið gleður augað. 

Punkturinn yfir i-ið er Wink-stóllinn eftir Toshiyuki Kita sem kom á markað hjá Cassina 1980 en hann er einn og sér í bókastofunni og kemur vel út eins og sést á ljósmyndum. 

Sjá nánar á fasteignavef mbl.is: Hlíðarbyggð 14