Smartland Mörtu Maríu | Heimili og hönnun | mbl | 15.12.2024 | 22:00

Hönnunarstjóri selur súpersmart raðhús í Garðabæ

Eldhúsið er einstaklega vel hannað. Steininn á eyjunni er fallegur og það er gott flæði í rýminu. Ljósmynd/Aðsend

Hjörvar Harðarson hönnunarstjóri og meðeigandi á auglýsingastofunni Ennemm og eiginkona hans, listamaðurinn Sigríður Valdimarsdóttir, hafa sett glæsilegt raðhús sitt í Garðabæ á sölu. Heimilið ber þess merki að hönnuðir búi þar enda hver hlutur á sínum stað og mikið lagt í að allt sé í góðu flæði.

Húsið sjálft er 236 fm að stærð og var reist 2011.

Heimaskrifstofan í eldhúsinu er vel útfærð. Allir sem vinna mikið vita að það er mjög gott að hafa tölvuna innan seilingar í amstri dagsins. Ljósmynd/Aðsend

Horft úr eldhúsi inn í stofu. Ljósmynd/Aðsend

Sjónsteypa á milli hæða

Stiginn á milli hæða er gerður úr sjónsteypu sem setur svip á húsið. Á efri hæðinni eru þrjú svefnherbergi, sjónvarpshol og stórt baðherbergi. Á neðri hæðinni er stofa og eldhús ásamt gestasalerni og bílskúr.

Sjónsteypt flæðir á milli hæða. Ljósmynd/Aðsend

Allar innréttingar í húsinu eru ítalskar og sérhannaðar frá Tisettanta/Elam. Nema innréttingar í þvottahúsinu, þær eru frá HTH. Lumex sá um lýsingu og eru allar hurðir sérsmíðaðar og án gerefta og ná upp í loft.

Stofan er vel heppnuð. Stórt verk eftir Pétur Gaut er á besta stað í stofu og svo má þar sjá Arco-lampann sem er mikil heimilisprýði. Ljósmynd/Aðsend

Sjá nánar á fasteignavef mbl.is: Lynghólar 8

Það er gott flæði í stofunni. Mottan á gólfinu skapar hlýleika og Noguchi borðið er alltaf klassískt en það var hannað af Isamu Noguchi. Ljósmynd/Aðsend