Smartland Mörtu Maríu | Heimili og hönnun | mbl | 10.1.2025 | 10:00 | Uppfært 12:39

Finnur Pind keypti einstakt raðhús í Fossvogi

Finnur Pind, stofnandi og framkvæmdastjóri Treble. Ljósmynd/Eygló

Finnur Kári Pind Jörgensen, stofnandi og framkvæmdastjóri nýsköpunarfyrirtækisins Treble Technologies, hefur fest kaup á raðhúsi í Fossvogi ásamt eiginkonu sinni, Birgittu Lind Vilhjálmsdóttur næringar- og matvælafræðingi. Húsið sem hjónin keyptu er við Giljaland 13 og vakti það athygli þegar það var auglýst til sölu.

Raðhúsið er 235,7 fm að stærð og var reist 1968. Húsið er á pöllum og afar smekklega innréttað.

Eldhúsið í húsinu snýr í norður og hefur að geyma hvíta sprautulakkaða eldhúsinnréttingu með dökkum borðplötum. Á einum veggnum í eldhúsinu eru flísar með fiskibeinamunstri sem setur svip á rýmið. Á veggnum er bæði vifta og veggljós sem búa til nýtískulegt yfirbragð.

Í eldhúsinu er gamaldags borðkrókur með hringlaga borði.

Á pallinum fyrir ofan eldhúsið er stofa með stórum gluggum sem snúa í suður. Í stofunni er sérstakur bókahilluveggur sem er bæði hægt að nota undir bækur en líka undir skrautmuni.