Haustið er að bresta á, kærkomin rútínan mætt og lífið að komast í fastar skorður á mörgum heimilum.
Eftir sumarfrí þykir mér ljúft og notalegt að finna festuna sem fylgir haustmánuðum og ná aftur heilsusamlega taktinum sem skal verða fastur liður í vetur.
Það er góður tími núna að skipuleggja dagbókina og ákveða með sjálfum sér megin áherslur haustannarinnar með heilsuna í forgangi.
Heilsureglurnar mínar fimm eru klárar fyrir veturinn. Markmiðið er að reyna eftir fremsta megni að fylgja þeim eftir af festu, einfaldlega vegna þess að ávöxtunin er svo gríðarleg, skilar sér í margfalt meiri orku og betri líðan og auknum lífsgæðum.
Vona að þær veiti þér innblástur til að setja niður á blað þínar eigin sem henta þér.
HEILSUREGLURNAR FIMM:
1. Lyfta lóðum 3x í viku, 30 mín í senn.
Þessi regla er fasti í mínu lífi, alveg óumsemjanlegt, enda finn ég gríðarlegan mun á orkunni og líðan þegar ég stunda lyftingar reglulega. Styrktarþjálfun gefur aukin lífsgæði og er eitt besta "yngingarlyf" sem til er, það er bara staðreynd. Skrái fasta tíma í dagbókina og reyni að hafa tímann 100% heilagan, banna sjálfri mér að bóka annað á þessum tíma!
2. Göngutúr eftir kvöldmat
Fyrir mitt leyti breytir miklu fyrir svefninn og meltinguna að borða kvöldmatinn í fyrra fallinu, á milli 18-19 og fara út í 15-30 mín göngutúr fljótlega eftir matinn. Meltingin batnar og svefninn verður mun betri, dýpri og ég sofna fyrr þegar meltingin er ekki í hámarki þegar ég leggst á koddann.
Labb er alls ekki það skemmtilegasta sem mér dettur í hug að gera á kvöldin og oft þarf ég að bíta á jaxlinn og láta veður og værukærð ekki stoppa mig, (kemur þó fyrir) klæði mig eftir veðri og ÚT! Best er að segja við sjálfan sig, bara 10 mínútur sem endar stundum í klukkustundar göngu. Vellíðanin sem maður uppsker fær mann til að drífa sig aftur næsta kvöld. “Ji hvað ég sé eftir að hafa farið í göngutúrinn” sagði enginn, aldrei.
3. 12-16 tíma næturfasta
Hef mikla trú á kostum þess fyrir heilsuna að hvíla alveg meltingarfærin í a.m.k. 12 klst á sólarhring. Fyrir mörgum árum setti ég mér þá reglu er að borða ekkert eftir kvöldmat án undantekninga. Byrja alltaf daginn á góðum kaffibolla, chiagraut með hreinum kefir, berjum og heimagerðu ósætu múslí. Stundum um kl. 9.00 og stundum ekki fyrr en um hádegið.
4. 98% sykurlaust líf
Sykur er gríðarlega ávanabindandi og ég hef lært að ef ég byrja á að borða sælgæti þá er erfitt að stoppa. Sykurpúkinn er lúmskur fjandi. Með árunum hef ég fundið fyrir aukinni vanlíðan, meltingaróþægindum, orkuleysi og uppþembu eftir smá sykursukk og finnst nammið, ótrúlegt en satt, ekki lengur þess virði. Markmiðið er sett á 98% sykurlaust líf, skil eftir 2% fyrir smá dökkt súkkulaði og einstaka Tiramisu sneið.
Sykurlaus lífsstíll er áskorun að tileinka sér og fyrst og fremst ákvörðun, því flestir eiga erfitt með að láta sætindi á móti sér. Það sem hefur hjálpað mér mikið er að nota sílesandi blóðsykursmæli og sjá hvaða áhrif sætindi o.fl. hefur á blóðsykurinn minn og mína efnaskiptaheilsu. Það gaf mér ekki síst aukna ástæðu til að stilla mig inn á að láta sætindin eiga sig.
5. Svefninn í forgang
Enginn efast um að nætursvefn er sannarlega grunnurinn að vellíðan og orku. Höfuðverkur, heilaþoka, aukin löngun í sætindi og ruslfæði og lágmarks orka fyrir líf og starf er eitthvað sem margir upplifa eftir lélegan svefn og andvökunætur og þar er ég sko engin undantekning. Skv. Matthew Walker höfundar bókarinnar Why We Sleep, getur svefnleysi valdið miklum heilsufarslegum skaða s.s. aukinni hættu á hjarta- og æðasjúkdómum, lakari andlegri og vitsmunalegri heilsu ásamt því að veikja ónæmiskerfið. Góður og stöðugur nætursvefn er algjör undirstaða fyrir andlega og líkamlega orku. Ég upplifi tilveruna svo miklu meira krefjandi þegar svefninn er í rugli og mun meiri áskorun að komast í gegnum daginn. Óskipulag og svefnóreiða kemur óhjákvæmilega fyrir á bestu bæjum og þá er ekkert annað en að vippa sér strax aftur inn á beinu brautina og halda sig við góðu reglurnar.
Ultrahuman snjallhringurinn er ein af mínum uppáhalds heilsugræjum, mikið gagnsemis- og hvatningartól. Þar fylgist ég með alls kyns tölfræði um svefninn, streituástandi, þjálfuninni minni o.fl. Hringurinn hefur kennt mér margt og mikið sem ég hef óspart nýtt mér til að stuðla að betri og dýpri svefni. Afar áhugavert og gagnlegt að sjá hvernig breytingar á mataræði, tímasetningar á matartíma og æfingatíma o.fl. geta haft mikil áhrif á svefninn.
Að lokum.
Góðar lífsvenjur geta verið allskonar, að læra nýja hluti, verða betri manneskja, bæta meiri gleði í lífið o.m.fl. En undirstaðan er þó alltaf vellíðan. Við getum allt betur ef okkur líður vel. Ég er alls ekki með fullkominn lífsstíl frekar en aðrir, við erum öll mannleg og lífið er allskonar. En það sem við sannarlega getum gert er að vinna stöðugt í því að vanda okkur þegar kemur að heilsunni. Það besta er að okkar eigin heilsa er að mörgu leyti undir okkur sjálfum komin. Margir eiga þess kost að upplifa gríðarlegan heilsufarslegan bata með því einu að vanda til við lífsstílinn. Allt hefur áhrif, einkum við sjálf.
agusta@hreyfing.is www.hreyfing.is