Töfrar í fertugsafmæli Selmu og Bjarkar

Selma Björnsdóttir leikstjóri og söngkona og Björk Eiðsdóttir ritstjóri MAN hafa alltaf verið eins og samlokur og þess vegna kom það engum á óvart að þær skyldu halda afmælið sitt saman. Selma varð fertug þann 13. júní og Björk verður fertug 13. september. 

Þakið ætlaði að rifna af Þjóðleikhúskjallaranum í gærkvöldi og steig hver tónlistarmaðurinn á fætur öðrum á stokk. Magnús Jónsson söng lagði Töfrar en það var uppáhaldslag Selmu og Bjarkar þegar þær voru yngri. Selma stalst gjarnan inn í herbergi stóru systur sinnar til að hlusta á plötuna. 

Margrét Eir sýndi magnaða takta þegar hún söng Euphoria með sænsku söngkonunni Lareen sem sigraði Euróvisjón-keppnina 2012 og Friðrik Ómar heillaði alla upp úr skónum. Selma tók lagið með Miðnæturkúrekunum sínum og Egill Ólafsson tryllti allt þegar hann steig á svið. Í lokin varð svo allt brjálað þegar Erpur Eyvindarson tók Hvíta skó og ýmis önnur vinsæl unglingalög. Hann mætti að sjálfsögðu í hvítum skóm með Havana Club flösku ... Það sem gerðist eftir það verður ekki rifjað upp hér.