Árni Páll mætti með mömmu sinni

Árni Páll Árnason, formaður Samfylkingarinnar, bauð mömmu sinni, Rósu Björk Þorbjarnardóttur, með sér á frumsýningu á Fjalla-Eyvindi og Höllu í Þjóðleikhúsinu í gær. Árni Páll var ekki sá eini sem tók móður sína með því það gerði Egill Ólafsson einnig en Tinna Gunnlaugsdóttir, fyrrverandi þjóðleikhússtjóri, fer með hlutverk í sýningunni.

Verkið er ástríðufull ástarsaga fólks sem fer í útlegð. Fjalla-Eyvindur er eitt þekktasta verk íslenskra leikbókmennta fyrr og síðar. Verkið var frumsýnt hjá Leikfélagi Reykjavíkur árið 1911. Eftir rómaða sýningu leikritsins árið eftir í Dagmar-leikhúsinu í Kaupmannahöfn barst hróður þess víða og var það sýnt á Norðurlöndunum, í Þýskalandi, Englandi, Rússlandi og Bandaríkjunum. Gerð var eftir því sænsk kvikmynd árið 1918.

Sögur af útilegumanninum Fjalla-Eyvindi og hinni stórlyndu ástkonu hans, Höllu, sem uppi voru á átjándu öld, hafa lifað góðu lífi með íslensku þjóðinni allt fram á okkar daga. Leikrit Jóhanns Sigurjónssonar er átakamikið og grípandi, skrifað af næmum mannskilningi og býr yfir mikilli harmrænni dýpt.

Halla er efnuð ekkja sem ræður Eyvind til sín sem vinnumann. Þau verða ástfangin og þegar Eyvindur neyðist til að flýja til fjalla, vegna saka úr fortíðinni, ákveður Halla að fara með honum. Inni á hálendi Íslands bíður þeirra hatrömm barátta við hörð náttúruöfl, einsemd, útskúfun og ofsóknir. En ekki síður þurfa þau að glíma við eigin tilfinningar og takast á hvort við annað. Getur ást þeirra staðið af sér þessa þolraun?