Hjónin Baltasar Kormákur og Lilja Pálmadóttir létu sig ekki vanta á jólafrumsýningu Þjóðleikhússins í ár. Sporvagninn Girnd var frumsýndur en það er eitt þekktasta verk bandarískra leikbókmennta á 20. öld.

Baltasar Breki, sonur Baltasars Kormáks og Ástrósar Gunnarsdóttur, fer með hlutverk Stanleys, sem er eiginmaður Stellu, sem er systir hinnar fíngerðu og ofurviðkvæmu Blanche DuBois, sem leikin er af Nínu Dögg Filippusdóttur. 

Það fer allt á annan endann þegar Blanche DuBois kemur í heimsókn til Stellu systur sinnar sem býr í verkamannahverfi í New Orleans. 

„Í eilífri leit sinni að fegurð, mildi og umhyggju verður Blanche fyrir áfalli þegar hún kynnist hinum ruddafengna og ósiðaða Stanley, eiginmanni Stellu, og spennan magnast fljótt á milli þeirra. Blanche líður best í hálfrökkri, en óttast það mest að vera afhjúpuð og að napur sannleikurinn blasi við,“ segir á vef Þjóðleikhússins. 

Stefán Baldursson leikstýrir verkinu.