Tómas Guðbjartsson lét sig ekki vanta þegar Baltasar Kormákur og RVK Studio héldu teiti í tilefni af velgengni Ófærðar og til að fagna lokatökum á Eiðnum, sem er nýjasta mynd Baltasars. Teitið var haldið á Bryggjunni Brugghúsi úti á Granda og fylltist húsið af fólki eftir að Eddunni lauk. 

Förðunarmeistarinn Ragna Fossberg fékk heiðursverðlaun Eddunnar fyrir störf sín sem sminka, en hún hefur sminkað og búið til gervi í sjónvarpsþáttum og kvikmyndum alla sína starfævi. Hún mætti sérstaklega hress og kát í teitið ásamt Birni Emilssyni manninum sínum. Í teitinu voru líka handritshöfundar Ófærðar, leikarar og aðrir aðstandendur sem nutu þess að skála fyrir góðu gengi sjónvarpsþáttarins. Það má, enda ekki á hverjum degi sem sjónvarpsþáttur fær þjóðina til að setjast saman fyrir framan sjónvarpið á sama tíma.