Söngleikurinn Mamma Mia var frumsýndur í Borgarleikhúsinu í gærkvöldi. Þakið ætlaði að rifna af húsinu að sýningu lokinni en á meðan sýningu stóð brostu hörðustu naglar landsins hringinn og klöppuðu stöðugt (við nefnum engin nöfn).

Jóhanna Vigdís Arnardóttir sló algerlega í gegn sem móðirin Donna en hún er ekki bara góð leikkona heldur mögnuð söngkona. Hennar bjarta og tæra söngrödd fékk hárin til að rísa og andlitið til að brosa hringinn. Helgi Björnsson var líka tryllingslega góður og það var líka Þórunn Arna Kristjánsdóttir, sem fer með hlutverk brúðarinnar. 

Unnur Ösp Stefánsdóttir leikstýrir Mamma Mia og Filippía Elísdóttir hannaði búningana. Ef þú ert að leita þér að stórkostlegri skemmtun í þrjá klukkutíma þá er Mamma Mia málið.