Tvær nýjar sýningar voru opnaðar í Hafnarborg á föstudagskvöldið. Annars vegar haustsýning Hafnarborgar 2016, sýningin Tilraun – leir og fleira, í aðalsal safnsins, og svo sýning sænska hönnuðarins Jenny Nordberg, 3 – 5 sekúndur – Hröð, handgerð framleiðsla, í Sverrissal Hafnarborgar þar sem hún mun flytja gjörning á opnuninni.

Sýningin Tilraun – leir og fleira er samtal sjónlista við leir þar sem vísað er í ólíka heima iðnaðar, lista, nytjalista og hönnunar. Þátttakendur sýningarinnar koma úr ólíkum starfsstéttum sjónlista. Þeir nota allir leir í verkum sínum en voru gefin mismunandi orð til að vinna þau út frá. Útkoman eru annars vegar fullgerð verk á meðan önnur sýna rannsókn eða vinnuaðferð.

Sýnendur eru: Aldís Bára Einarsdóttir, Anna Hallin, Bjarnheiður Jóhannsdóttir, Brynjar Sigurðarson, Búi Bjarmar Aðalsteinsson, Erna Elínbjörg Skúladóttir, Hanna Dís Whitehead, Hildigunnur Birgisdóttir, Daniel Durnin, Garðar Eyjólfsson, Gunnhildur Helgadóttir, Olga Bergmann, Páll Einarsson, Ragnheiður Ingunn Ágústsdóttir, Sigga Heimis, Sigrún Jóna Norðdahl, Sigurður Guðmundsson, Sigurður Hauksson, Sigurlína Margrét Osuala, Theodóra Alfreðsdóttir og Veronika Sedlmair.

Jenny Nordberg er iðnhönnuður búsett í Svíþjóð sem hefur hlotið viðurkenningar og lof sem framsækinn hönnuður á alþjóðavettvangi. Jenny staðsetur sig á milli myndlistar og hönnunar og leitast við að víkka út hugmyndir samtímans um hönnun og hönnuði. Verkefnið er styrkt af sænska sendiráðinu á Íslandi.