Himnaríki og helvíti var frumsýnt í gærkvöldi í Borgarleikhúsinu. Sýningin byggist á þríleik Jóns Kalmans Stefánssonar, bókunum Himnaríki og helvíti, Harmur englanna og Hjarta mannsins – einu umtalaðasta stórvirki íslenskra bókmennta á síðari tímum. Það var unun að hlusta á setningarnar í sýningunni og stundum var gott að loka augunum og bara hlusta. Það var samt ekki hægt að hafa augun lokuð allan tímann því leikmyndin og búningarnir eru svo mikið fyrir augað. Helga Stefánsdóttir er búningahönnuður sýningarinnar og Egill Ingibergsson hannaði leikmyndina. 

Egill Heiðar Anton Pálsson leikstýrir verkinu, sem er í fáum orðum sagt rúmlega þriggja tíma veisla. 

Aðalhlutverkð í sýningunni leikur Þuríður Blær Jóhannesdóttir en hún fer með hlutverk Stráksins sem trúir því að orð muni breyta heiminum og vekja látna aftur til lífs. Aðrir leikarar eru Margrét Vilhjálmsdóttir, Bergur Þór Ingólfsson, Birna Rún Eiríksdóttir, Björn Stefánsson, Hannes Óli Ágústsson, Haraldur Ari Stefánsson, Katla Margrét Þorgeirsdóttir, Sigrún Edda Björnsdóttir og Valur Freyr Einarsson. 

Í verkinu er tekið á örlögum fólks sem er nátengt hafi, fjöllum og veðri, en örlög þess ráðast einnig í Plássinu þar sem mannlífi allra tíma á Íslandi er lýst og brugðið undir sjóngler og bæði konur og karlar takast á í hörkulegri lífsbaráttunni. Eitt eiga allar manneskjurnar sameiginlegt: Þær eru í leit að ástinni, en reynast misvel undirbúnar fyrir ferðalagið á þeim hála ís.

Bækur Jóns Kalmans Stefánssonar hafa verið þýddar á fjölda tungumála og vakið athygli fyrir skarpa afhjúpun á mannlegu eðli. Jón hefur margsinnis verið tilnefndur til Bókmenntaverðlauna Norðurlanda og Íslensku bókmenntaverðlaunanna sem hann hlaut árið 2015. Hann hefur fengið fjölda annarra verðlauna, innlendra sem erlendra, og hefur í seinni tíð jafnvel verið orðaður við sjálf Nóbelsverðlaunin í bókmenntum.

Bjarni Jónsson hefur hlotið margvísleg verðlaun og viðurkenningar fyrir verk sín, m.a. Grímuverðlaunin og Norrænu útvarpsleikhúsverðlaunin auk þess sem hann hefur verið tilnefndur í tvígang til Norrænu leikskáldaverðlaunanna.