Það var stuð og stemning í loftinu þegar MBA-nemar við Háskóla Íslands ákváðu að sletta úr klaufunum eftir veturinn. Gleðin fór fram á Vinnustofu Kjarval síðasta föstudag. Frímann Gunnarsson lífskúnstner stýrði veislunni ásamt dr. Svölu Guðmundsdóttur sem er stjórnarformaður MBA-námsins. 

Bæði fyrsta árs nemar og annars árs nemar, sem útskrifast 27. júní næstkomandi, voru þarna saman komnir eftir stíf verkefnaskil. 

Annars árs nemar voru að klára sitt síðasta námskeið í miðlun upplýsinga, þar sem Sigmar Guðmundsson á RÚV hefur þjálfað hópinn í að koma fram og verið með hópinn í stífri þjálfun undanfarna daga. Fyrsta árs nemar fóru í námsferð til IESE-háskólans í Barcelona fyrr í vor og hafa undanfarnar vikur farið í að vinna verkefni um hvaða ráðstafanir leiðtogar í smáríkinu Íslandi geti gripið til í utanríkismálum/alþjóðasamskiptum til að draga úr vægi áfalla. Frímann deildi svo að sjálfsögðu visku sinni til nemenda enda heimsborgari mikill.