Lokkandi en einnig særandi og beittur

Á Kvennréttindadaginn, föstudaginn 19. júní, var kvennaboð Multis haldið í gömlu Osta- og smjörsölunni að Snorrabraut 54. Tilefni þess að blásið var í partílúðrana var frumsýning á nýju  fjölfeldisverki eftir Gjörningaklúbbinn. Verkið heitir, Hælspyrna / Heel Kick, og er frá árinu 2020.  Listakonurnar Jóní Jónsdóttir og Eirún Sigurðardóttir sem saman mynda Gjörningaklúbbinn voru á staðnum og töluðu um verkið, sem unnið var sérstaklega fyrir Multis.

Fjölmargar konur lögðu leið sína í kvennaboð Multis. Þar á meðal voru Hrund Gunnsteinsdóttir, Ásdís Spano, Helga Thors, Sveinbjörg Þórhallsdóttir og Arna Gerður Bang svo einhverjar séu nefndar. 

Hugmyndir Gjörningaklúbbsins tengjast oft félagslegum málefnum með femínískum áherslum í bland við glettni og hressandi einlægni. Gjörningaklúbburinn vinnur í þá miðla sem þjóna hugmyndum hans hverju sinni, svo sem gjörninga, ljósmyndir og innsetningar og nýtir sér gjarnan verkfræði ömmunnar, handverk og útsjónarsemi í bland við glæsileika og nútímatækni.

Hælaskórinn hefur fylgt Gjörningaklúbbnum frá fyrstu tíð. Hann er lokkandi og hækkandi en einnig særandi og beittur. Hann er framakonunnar helsti félagi þrátt fyrir að reynast henni oft fjötur um fót þegar vikivaki framþróunarinnar er stiginn.

Multis er samstarfsverkefni þeirra Ásdísar Spanó og Helgu Óskarsdóttur myndlistarkvenna, eigenda Multis og ráðgjafa á sviði myndlistar. Áhersla er á kynningu, útgáfu og sölu áritaðra og tölusettra fjölfeldisverka eftir íslenska myndlistarmenn. Listamennirnir sem kynntir eru hjá Multis eru allir viðurkenndir samtímalistamenn.