Manuela Ósk Harðardóttir mætti með ömmu sinni, Jóhönnu Norðfjörð, á hátíðarsýningu Vertu úlfur sem fram fór í gærkvöldi í Þjóðleikhúsinu. Frumsýningu var skipt í tvennt og var sú fyrri á föstudagskvöldið og seinni í gærkvöldi.

Verkið Vertu úlfur er byggt á sjálfsævisögu Héðins Unnsteinssonar en í bókinni talar hann opinskátt um geðhvörf sín. Vertu úlfur hrífur fólk með í brjálæðislegt ferðalag um hættulega staði hugans inn í veröld stjórnleysis og örvæntingar og aftur til baka. Áhorfandinn fær innsýn í baráttu manns sem tekst að brjótast út úr vítahringnum og nær að snúa sinni skelfilegustu reynslu upp í þann styrk sem þarf til að breyta öllu kerfinu.

Björn Thors leikur aðalhlutverk í sýningunni og er leikstýrt af eiginkonu sinni, Unni Ösp Stefánsdóttur. Saman ná þau að búa til einstaka upplifun fyrir áhorfandann. Til þess að hreyfa við hverri einustu taug mannslíkamans var Elín Hansdóttir fengin til að sjá um leikmynd og myndbandshönnun. Filippía Elísdóttir sá um búningana og Valgeir Sigurðsson um tónlistina. 

Eins og sést á myndunum var einstök stemning í húsinu enda leikhúsgestir þakklátir fyrir að fá loksins upplyftingu andans, sem gerist eiginlega bara í leikhúsi.