Hvað gerist þegar gamlar vinkonur hittast og eru saman í sumarbústað heila helgi? Hvað gera miðaldra konur þegar þær fá pásu frá eiginmönnum og börnum og jafnvel barnabörnum? Ef þú hélst að miðaldra konur hlustuðu bara á Bó Halldórs og drykkju te á meðan þær prjónuðu þá ættir þú að skella þér á kvikmyndina Síðasta saumaklúbbinn í leikstjórn Göggu Jónsdóttur. Þar er þessi hópur afhjúpaður, eða allavega svona næstum því! 

Í kvöld var kvikmyndin frumsýnd í Laugarásbíói og er með góðu móti hægt að segja að fólk hafi hlegið mikið - konur hlógu þó oft að öðrum atriðum en karlar. 

Þarna fara Helga Braga Jónsdóttir, Elma Lísa Gunnarsdóttir, Jóhanna Vigdís Arnardóttir, Arndís Hrönn Egilsdóttir og Edda Björg Eyjólfsdóttir með aðalhlutverkin. Þær skemmta fólki frá fyrstu mínútu og halda athygli allan tímann. Búningahönnun og leikmynd er líka upp á 10 en í myndinni má lesa týpurnar nokkuð vel ef rýnt er í klæðaburð, hárgreiðslu og förðun. Það er þó hægt að blekkja augað þótt og í myndinni kemur í ljós að allir eiga sína sögu þótt þagað hafi verið yfir henni í 30 ár!