Það var einstök stemning í Kassa Þjóðleikhússins þegar verkið um Ástu Sigurðardóttur var frumsýnt. Tinna Gunnlaugsdóttir, leikkona og fyrrverandi þjóðleikhússtjóri, og Egill Ólafsson stórstjarna létu sig ekki vanta enda er sonur þeirra, Ólafur Egill Ólafsson, leikstjóri verksins. 

Verkið Ásta fjallar um listakonuna Ástu Sigurðardóttur sem var fædd 1930 en hún lést 1971. Hún var lifandi goðsögn í bæjarlífi Reykjavíkur um miðbik síðustu aldar. Myndlist hennar og ritverk vöktu aðdáun en líka hneykslun og oft urðu skilin á milli lífs þessarar hæfileikaríku en breysku konu og höfundarverks hennar óljós.

Ásta hikaði ekki við að ögra ríkjandi viðhorfum og fylgja kalli hjarta síns, en brenndi kertið í báða enda og féll frá langt fyrir aldur fram. Hún varð táknmynd hinnar frjálsu konu, kynfrelsis nýrra tíma og framúrstefnulistar en mætti fordómum og útskúfun og kynntist hinu dýpsta myrkri sorgar og örvæntingar. Saga Ástu er líka saga um vonir, langanir og drauma sem enn geta ræst.

Í sýningunni um Ástu flytja Matthildur Hafliðadóttir söngkona og hljómsveit Guðmundar Óskars Guðmundssonar frumsamin lög við ljóð Ástu og endurskapa tíðarandann í tónum.

Birgitta Birgisdóttir leikur Ástu en aðrir leikarar eru Aðalbjörg Þóra Árnadóttir, Gunnar Smári Jóhannesson, Oddur Júlíusson, Hákon Jóhannesson og Steinunn Arinbjarnardóttir.