Metsöluhöfundurinn Ragnar Jónasson fagnaði nýjustu bók sinni, Úti, í Iðnó í gær. Fullt var út úr dyrum í Iðnó og forsætisráðherra tók sér hlé frá Arctic Circle ráðstefnunni til þess að heilsa upp á verðandi meðhöfund sinn, en eins og kunnugt er vinna þau nú að glæpasögu.

Úti er þrettánda bók Ragnars og er sálfræðitryllir sem gerist í veiðikofa uppi á heiði í aftakaveðri.

Velgengni Ragnars erlendis á sér fá fordæmi en skemmst er þess að minnast að hann átti þrjár bækur á topp tíu lista í Þýskalandi í fyrra en enginn íslenskur rithöfundur hefur náð því fyrr.

Þá varð hann á þessu ári fyrsti íslenski höfundurinn til þess að komast á metsölulista í Bretlandi og Bandaríkjunum, hjá Sunday Times og Wall Street Journal. Einnig eru Warner Bros. og CBS að vinna að sjónvarpsþáttasyrpum byggðum á bókum hans.