Stjórnmálafræðiprófessorinn Eiríkur Bergmann fagnaði útkomu bókar sinnar, Þjóðarávarpið, á Skuggabaldri á föstudaginn var. Það var ekki þverfótað fyrir þekktu fólki en þangað mætti Björn Ingi Hrafnsson ritstjóri Viljans, Helgi Hjörvar, Ásgeir Friðgeirsson, Guðlaugur Þór Þórðarson eiginmaður Ágústu Johnson, Anna Sigrún Baldursdóttir einn af framkvæmdastjórum Landspítalans, Hilmir Snær Guðnason leikari og Breki Karlsson formaður Neytendasamtakanna. 

Þjóðarávarpið fjallar um þjóðernishugmyndir, populisma, upplýsingaóreiðu og samsæriskenningar sem hafa verið áberandi í samtímanum í þjóðfélagsumræðu á Vesturlöndum. 

„Þetta var skrambi gott stuð. Fullt af sérdeilis góðu fólki og fulltrúi Eymundsson sagði að bókin hefði selst á við mest spennandi skáldsögur haustsins. Enda er þetta líkast til safaríkasta saga sem hægt er að segja. Dramatískustu atburðir okkar samtíma á 400 síðum sléttum,“ segir Eiríkur Bergmann í samtali við Smartland.