Sigrún Helga Lund tölfræðingur hjá Íslenskri erfðagreiningu og Arndís Anna K. Gunnarsdóttir þingmaður eru búnar að vera vinkonur lengi og ákváðu fyrir um áratug að þær ætluðu að halda saman upp á 40 ára afmæli sín. Þær eru báðar fæddar 3. febrúar hið herrans ár 1982. Það var á því tímabili í lífi þeirra sem þær stofnuðu samtök um bíllausan lífsstíl. Draumurinn um sameiginlegt 40 ára afmæli rættist á föstudaginn þegar þær blésu til glæsilegs teitis sem endaði með brúðkaupi. Þær giftust þó ekki hvor annarri heldur ákvað hver fyrir sig að giftast sjálfri sér og kom það í hlut Kamillu Einarsdóttur rithöfundar að gifta þær. 

„Giftingarhugmyndin var fyndin því okkur hafði báðum dottið hún í hug. Við höfum verið einhleypar meira og minna síðustu ár og því var það fjarlægt að við myndum gifta okkur á næstu árum. Okkur langaði að fara í brúðarkjól og þetta var einhvern veginn brúðarkjólastemning,“ segir Arndís og Sigrún tekur undir.

„Í staðinn fyrir að giftast hvor annarri ákváðum við að giftast sjálfum okkur. Ég ákvað að giftast mér og hún sér," segir Sigrún. 

Í miðju boði skiptu þær úr afmæliskjólum yfir í brúðarkjóla og þegar Brúðkaupslag Todmobile var spilað gengu þær upp á svið í Iðnó. Þetta vakti mikla gleði á meðal afmælisgestanna. Arnór Pálmi og Elísabet Ólafsdóttir voru veislustjórar og pössuðu upp á að ekkert myndi klikka. Svo settist Arndís fyrir aftan trommusettið í brúðarkjólnum og spilaði Go slow með hljómsveitinni HAIM.