Það var mikið hlegið á prófkjörsgleði Herdísar Önnu Thorvaldsdóttur í gær þegar hún tók á móti vinum og vinveittum á sínum hverfisstað, Ölveri í Glæsibæ. Herdís sækist eftir fjórða sæti á lista Sjálfstæðisflokksins í komandi kosningum.

Karl Örvarsson og Pálmi Sigurhjartar fóru á kostum og komu Herdísi á óvart með stórum borða þar sem á stóð, „komdu aftur til mín Dísa“ en hún var einmitt varaborgarfulltrúi á síðasta kjörtímabili.

Herdís fór á svið og talaði til síns fólks og annarra frambjóðenda. Hún kom inn á sína sýn á þátttöku í prófkjörum, hún vill ekki lýsa þeim sem prófkjörsslag eða baráttu heldur kapphlaupi.

„Við berjumst ekki þar til síðasti maður er fallinn heldur erum við í sama liði og þó hver og einn vilji ná sem bestum persónulegum árangri þá nýtum við kjölsogið hvert frá öðru og að keppni lokinni stöndum við saman sem heild,“ sagði Herdís.

Gleðin þótti góður endapunktur á kapphlaupið, það var skemmtileg stemmning og hugur í þeim frambjóðendum sem viðstaddir voru en kosning í prófkjörinu hófst í morgun og líkur annað kvöld.