Á sjötta hundrað herramenn mættu á landsfrægt herrakvöld Íþróttafélagsins Fylkis í Árbæ, sem haldið var í þrítugasta sinn í síðustu viku. Þangað mætti til dæmis Dagur B. Eggertsson borgarstjóri en hann er alinn upp í Árbæ City eins og hverfið er kallað af fólki í innsta hring. Með honum var Hjálmar Sveinsson sem er ekki alinn upp í Árbæ City. Hvort þeir tóku leið 10 upp í Árbæ City er ekki vitað. Varla hafa þeir ferðast um með einkabíl. 

Katrín Jakobsdóttir, forsætisráðherra, stal senunni með ræðu sinni en hún var ein af fáum kvenkyns sem fékk inngöngu þetta kvöld. Á þessu herrakvöldi var einn mesti karl landsins, Gísli Einarsson, í Landanum fenginn til að sjá um veislustjórn. Hann var nánast óþekkjanlegur því hann var í jakkafötum - ekki lopapeysu. 

Eyþór Ingi og Andri Ívarsson sáu um að skemmta Fylkismönnum fram eftir kvöldi. Á þessum herrakvöldum er jafnan málverkauppboð og fleira sniðugt en Smartland Mörtu Maríu hefur heimild fyrir því að einhver málverk séu ennþá inni í bílskúr í Árbæ City og hafi ekki verið kynnt fyrir öðrum heimilismeðlimum. Það þarf nefnilega að finna rétta augnablikið til að afhjúpa dýrð sem fjárfest var í undir áhrifum Bakkusar konungs.