Veðrið lék við forsprakka Framtíðarinnar á Seltjarnarnesi á föstudaginn þegar boðið var í sumargleði á golfvellinum í hverfinu. Karl Pétur Jónsson er oddviti flokksins og þeir sem þekkja hann vita að það er alltaf fjör þar sem hann drepur niður fæti.

Það er því kannski ekki að undra að á annað hundrað manns hafi mætt til að taka þátt í fjörinu. Veðrið lék við gestina en á meðan á boðinu stóð var bæði sól og logn sem gerist ekki oft í bæjarfélaginu. 

Hallgrímur Ólafsson hélt utanum dagskránna en þangað mætti Auður Jónsdóttir rithöfundur og var með hugvekjum um framtíð bæjarfélagsins. Uppistandarinn Anna Þóra Björnsdóttir var drepfyndin að vanda en hún er líka í framboði fyrir Framtíðina á Seltjarnarnesi. Ef hún kemst inn í bæjarstjórn er gefið mál að það verður mikið hlegið á fundum.

Tónlistarmaðurinn Jóhann Helgason söng þrjú lög og svo kom Helgi Björnsson og keyrði upp fjörið með sínum einstaka hætti.