Guðrún Gísladóttir og Jóhann Sigurðarson áttu stórleik þegar Síðustu dagar Sæunnar var frumsýnt í Borgarleikhúsinu. Verkið er eftir Matthías Tryggva Haraldsson sem margir kannast við úr hljómsveitinni Hatara en hann er eitt af fráfarandi leikskáldum Borgarleikhússins.  Una Þorleifsdóttir leikstýrir verkinu sem fjallar um dauðann, Sæunni, svartan morgunverð og soninn sem nennir aldrei að heimsækja hana. 

Allir deyja, þar á meðal Sæunn. Hún nennir alls ekki að prjóna og hún veltir því fyrir sér hver eigi að erfa hvað. Hún sér líka eftir að hafa ekki skapað fleiri minningar þótt allar gömlu minningarnar hafi kannski ekki verið neitt sérstakar. 

Það var vel mætt á frumsýninguna. Fjölskylda Matthíasar Tryggva lét sig ekki vanta og heldur ekki unnusta hans, Brynhildur Karlsdóttir. Þar var líka Silja Aðalsteinsdóttir bókmenntafræðingur og rithöfundur, Vigdís Finnbogadóttir fyrrverandi forseti Íslands og Hallgrímur Helgason listamaður. Illugi Jökulsson útvarpsstjarna og eiginmaður Guðrúnar var að sjálfsögðu í salnum og fylgdist stoltur með eiginkonu sinni. 

Ef fólk vill láta hrista aðeins upp í sér þá ætti það að skella sér í leikhús og ekki síst ef það vill læra að borða svartan morgunverð.