Pálmi Kormákur Baltasarsson og mótleikkona hans, hin japanska Koki, voru í stuði í veislu í japanska sendiráðinu á dögunum. Japanski sendiherrann, Ryotaro Suzuki, bauð í mat og drykk í tilefni nýjustu kvikmyndar Baltasars Kormáks sem byggð er á bókinni Snertingu eftir Ólaf Jóhann Ólafsson. 

Koki, réttu nafni Mitsuki Kimura, leikur Miko, stúlkuna sem er aðalpersóna myndarinnar. Sögumaður bókarinnar, Kristófer, verður ástfanginn af henni sem ungur maður í London þegar hann ræður sig til vinnu á japönskum veitingastað. Hinn unga Kristófer leikur sonur Baltasars, Pálmi Kormákur, en Kristófer á áttræðisaldri leikur Egill Ólafsson.

Koki er stórstjarna í Japan en hún er fædd árið 2003 og hóf ferilinn sem fyrirsæta og söngkona og hefur nú snúið sér að leiklistinni. Rétt eins og Pálmi Kormákur á hún ekki langt að sækja hæfileikana en faðir Koki er leikarinn Takuya Kimura sem er einnig frægur leikari.