Það var allt í blóma þegar hönnunar- og arkitektúrunnendur mættu á sumargleði og ársfund Miðstöðvar hönnunar og arkitektúrs, sem fór fram í Grósku hinn 14. júní síðastliðinn. Það var bæði fjölmennt og góðmennt á fundinum, sem leystist svo upp í almenna gleði. 

Síðustu misseri hafa verið viðburðarík hjá Miðstöðinni og fengu gestir því innsýn í fjölbreytt verkefni sem vöktu athygli á nýafstöðnum og vel heppnuðum Hönnunarmarsi. Sömuleiðis var farið yfir árið sem leið hjá Miðstöðinni.

Lilja Dögg Alfreðsdóttir, menningar- og viðskiptaráðherra, mætti á viðburðinn og hélt ánægjulegt erindi um bjarta tíma fram undan. Ný stefna í málefnum hönnunar og arkitektúrs til ársins 2030 hefur litið dagsins ljós og samkvæmt nýjustu menningarvísum Hagstofunnar fjölgar starfandi einstaklingum í hönnun og arkitektúr hlutfallslega mest á sviði skapandi greina og því ærið tilefni til að fagna og skála.