Það var mikið fjör á forsýningu kvikmyndarinnar Barbie í Smárabíói í gærkvöldi. Þangað mætti fríður hópur sem kallar sig „50 gaurar í bíó“ en eins og nafnið gefur til kynna eru í hópnum 50 „gaurar“ sem allir mættu í sérmerktum bolum sem þeir létu útbúa fyrir tilefnið. 

Forvígismaður hópsins er leikarinn Arnór Björnsson, en hann segir hugmyndina hafa kviknað út frá tísti sem hann sá. „Það var fallegt vorkvöld og ég var á leiðinni í bíó með 11 gaurum á Guardians of the Galaxy og þá varð mér hugsað til tístsins sem hljóðar einhvern veginn þannig að stelpur hati að sjá 11 gaura fara saman í bíó,“ útskýrir Arnór.

„Ég hugsaði: „Vá hvað þetta er gaman að fara með svona gaurum í bíó“ og hugsaði svo: „Hvað er meira en 11?“ og svarið var: „50“ sem mér fannst raunhæf tala en samt fáránleg. Síðan bjó ég til facebook-hóp að nafni „50 gaurar í bíó“ og þá var þetta farið að vera algjört prinsippmál eftir að ég ákvað töluna 50. Þetta var í rauninni samansafn af strákum úr hópspjöllum sem ég er í, vinahópurinn úr Versló og LHÍ-vinahópurinn og eitthvað svoleiðis, en ég fór bara í gegnum hópspjöllin þar til ég var kominn upp í 50,“ segir hann.

„Undir lokin var svo mikið stress að við værum 50, því þetta þurftu að vera akkúrat 50 gaurar, og ég hélt ég hefði misreiknað þarna undir lokin. En svo enduðum við í sléttum 50 og það var það fallegasta sem ég hef séð,“ segir Arnór. 

„Þetta var síðan bara eins og við værum að halda fullorðins barnaafmæli, svona hópferð í bíó. Mér leið líka eins og ég ræki ferðaskrifstofu þarna um tíma að halda utan um allan þennan fjölda,“ segir Arnór og hlær.

„Held að Barbie sé besta mynd ársins“

Aðspurður segir Arnór kvikmyndina Barbie hafa orðið fyrir valinu af tveimur ástæðum, annars vegar vegna þess að hann sé mikill aðdáandi leikstjóra myndarinnar, Gretu Gerwig, en líka því honum þótti skemmtilegur kontrast að þeir færu 50 strákar með svona mikla karlorku á mjög femíníska mynd. Hann hafði í kjölfarið samband við Smárabíó sem tók vel í hugmyndina og bjó til forsýningu fyrir strákana. „Við prentuðum boli með nafni hópsins, gullfallegir,“ segir Arnór.

Arnór segir kvikmyndina hafa komið hópnum á óvart. „Ég held að Barbie sé besta mynd ársins og þú mátt hafa það eftir mér. Karmað í þessu öllu saman er svo að Barbie fjallar mikið um kynjamismunun í heiminum, en það sem breytti svo stemningunni og lét okkur alla roðna smá er að hún fjallar að hluta til um hvað karlorkan getur verið yfirgnæfandi og að ef hún er ekki sett í réttar skorður geti hún eitrað úr frá sér og eyðilagt aðra orku,“ segir Arnór.

„Og þarna sátum við, 50 gaurar, í smekkfullum sal þar sem voru aðallega konur, mæður með dætrum sínum eða vinkonuhópar, og við sukkum aðeins í sætin okkar og hugsuðum: „Já bíddu, við erum þessir gæjar akkúrat núna.“ Þannig að eftir á stóðum við allir upp og klöppuðum og ég held þetta hafi verið 50 breyttir gaurar á Barbie þarna í lokin,“ segir Arnór að lokum.