Sýningin Samhljómur, með verkum eftir Áslaugu Írisi Katrínu Friðjónsdóttur og Ingunni Fjólu Ingþórsdóttur var opnuð í sendiráði Íslands í Kaupmannahöfn á föstudaginn var. Sendiherra Íslands í Kaupmannahöfn, Árni Þór Sigurðsson, opnaði sýninguna en það er Listval Gallery sem stendur að henni. 

Á sýningunni Samhljómur leiðir Listval saman myndlistarmennina Áslaugu Írisi Katrínar Friðjónsdóttur og Ingunni Fjólu Ingþórsdóttur sem vinna báðar með sterka efniskennd og formhugsun í verkum sínum. Samhengi hluta og fyrirbæra í tíma og rúmi er þeim báðum hugleikið og birtist á ólíkan hátt í verkum þeirra. Á meðan Ingunn Fjóla kannar mörk málverks og vefnaðar samhliða spurningum um kerfi og samhengi lita vinnur Áslaug Íris með samspil forma, efnis og myndbyggingar. Hér blandast margvíslegur efniviður við málaða fleti og þræði sem birtist í óhlutbundnum formum og í samhljómi við liti, efni og myndbyggingu. 

Vel var mætt á opnunina og voru allir í sumarskapi eins og sést á myndunum.