Það var vel mætt í útgáfuboð Höllu Tómasdóttur á dögunum en hún var að gefa frá sér bókina Hugrekki til að hafa áhrif. Það var svo vel mætt að opna þurfti inn á lager til þess að koma öllum partígestunum fyrir og á tímabili var aðalstuðið í bílakjallaranum sem er staðsettur undir bókaversluninni við Hverfisgötu. 

Halla er forstjóri B Team í dag en hún hefur unnið fyrir fyrirtæki eins og Pepsi og M&M/Mars, tekið þátt í uppbyggingu Háskólans í Reykjavík og leitt verkefnið Auður í krafti kvenna. Hún var annar stofnanda Auðar Capital og fór í forsetaframboð 2016 þegar Guðni Th. Jóhannesson var kosinn. 

Í Hugrekki til að hafa áhrif deilir Halla reynslu úr lífi og starfi sem og sögum af fyrirtækjum og fólki sem hafa virkjað krafta sína til góðra verka og þannig náð bæði miklum árangri og fundið innri gleði. Bókinni er ætlað að veita lesandanum innblástur til að bæta sig og sitt samfélag og í henni má finna fjölda góðra ráða, hvetjandi sögur, hugleiðingar og gagnlegar spurningar sem efla leiðtogann innra með okkur. 

„Ég hef þá einlægu trú að allar breytingar byrji með einni manneskju sem hefur hugrekki til að hafa áhrif og fær fleiri með sér í lið. Ég vona að þú finnir þinn stað, þinn málstað til að leiða breytingar til góðs og minni þig á að allar breytingar byrja með góðu fólki sem ákveður að starfa með öðru góðu fólki að því að gera heiminn eilítið betri í dag en í gær. Ef við veljum að taka þátt, gera gagn og láta gott af okkur leiða, þá eru í reynd okkar björtustu tímar fram undan,“ segir Halla.