Það var líf og fjör á fyrsta opnunarviðburði FKA Framtíðar, sem er deild innan FKA, þegar þær fengu Ragnhildi Þórðardóttur, Röggu nagla, til þess að vera með kennslustund í því að setja mörk. Ragga fór á kostum en hún er sálfræðingur og er orðin þekktur heilsuáhrifavaldur. Fundurinn fór fram í húsakynnum Sýnar og sögðu nokkrir kvenstjórnendur hjá fyrirtækinu frá starfi sínu hjá fyrirtækinu. Þar á meðal var Sesselja Birgisdóttir framkvæmdastjóri, Kristín Friðgeirsdóttir fjármálastjóri, Kristjana Brynjólfsdóttir þróunarstjóri sjónvarpslausna og Eva Georgsdóttir framleiðslustjóri.  

Þema fundarins var „sterkari þú“ en FKA Framtíð vinnur með það slagorð í vetur. Eins og sést á myndunum voru allar í essinu sínu og til í slaginn.