Hátíðarsalur Grósku var þéttsetinn af sprotum, fjárfestum og bakhjörlum á lokadegi viðskiptahraðalsins Startup Supernova á dögunum, en Vigdís Hafliðadóttir, tónlistarkona og grínisti, opnaði viðburðinn við mikið lófaklapp. Viðskiptahraðallinn hefur staðið yfir í sex vikur en markmiðið með honum er að hraða framþróun þeirra sprota sem taka þátt og gera þau fjárfestingarhæf.

Tíu öflugir sprotar kynntu verkefnin sín á lokadegi viðburðarins, en Startup Supernova er stökkpallur fyrir sprotafyrirtæki og vettvangur til tengslamyndunar við aðila í atvinnulífinu, reynda leiðbeinendur og frumkvöðla sem hafa yfir að ráða þekkingu og reynslu af sprotaumhverfinu.

Tíu fyrirtæki valin eftir strangt umsóknarferli

Í ár hófst hraðallinn á Masterclass þar sem fjölmargir sérfræðingar, fagaðilar og frumkvöðlar í íslensku atvinnulífi miðluðu þekkingu sinni og reynslu til fjölda sprotafyrirtækja. Tíu fyrirtæki voru svo valin til áframhaldandi þátttöku eftir strangt umsóknarferli.

Sprotarnir sem komu fram og kynntu hugmyndir sínar í hátíðarsal Grósku voru Knittable, Astrid, Synia, Quality Master, KuraTech, Lóalóa, ModulHR, Revolníu, Skarpur og Souldis.

Ýmsir áhorfendur höfðu á orði að mörg þessara nýsköpunarverkefna væru á heimsmælikvarða.

„Startup SuperNova hefur fest sig í sessi sem einn af mikilvægustu viðskiptahröðlum á Íslandi þar sem sprotafyrirtæki fá gott veganesti til að vaxa og dafna eftir að hraðli lýkur. Tíu frambærileg sprotafyrirtæki voru valin úr hópi fjölda umsókna og við sjáum að þar á meðal gætu leynst næstu sprotastjörnur Íslands. Við hlökkum til að fylgjast með þessum öflugu sprotum í framtíðinni,” segir Jenna Björk Guðmundsdóttir, verkefnastjóri Startup Supernova hjá KLAK – Icelandic Startups.

Startup Supernova er sam­starfs­verk­efni Nova og KLAK – Icelandic Startups með stuðningi Huawei þar sem leitast er við að byggja upp viðskiptalausnir ætlaðar alþjóðamarkaði.