Íslenska hönnunarfyrirtækið FÓLK Reykjavík opnaði sýningarrými og skrifstofur í Kaupmannahöfn á dögunum. Þar verða allar vörur fyrirtækisins til sýnis, þar á meðal sófi sem hannaður var af Gunnari Magnússyni heitnum árið 1962.

Rýmið er staðsett á Fredericiagade 17 sem er nálægt dönsku konungshöllinni í nágrenni við mörg dönsk hönnunarfyrirtæki og gallerí.

Nú hefur fyrirtækið stofnað danskt dótturfélag til að stýra sölu alþjóðlega og er sú vinna nú þegar farin að bera árangur að sögn Rögnu Söru Jónsdóttur stofnanda fyrirtækisins en dönsku endursöluaðilarnir Illums Bolighus, Illum og H Skjalm P hafa tekið vörur FÓLKs til sölu auk Teak Store í New York. 

„Markmið fyrirtækisins er að fjölga endursöluaðilum hratt á næstu árum, sérstaklega í Evrópu en einnig Bandaríkjunum og Asíu auk þess að breikka vörulínur byggða á áherslum sjálfbærni og hringrásarhráefnum. Ráðinn hefur verið reynslumikill sölustjóri og nú starfa 5 starfsmenn með FÓLK að sölu, þróun og rekstri,“ segir Ragna Sara.