Það skapaðist einstök stemning í Sky Lagoon á góðgerðatónleikunum Sungið með sorginni á þriðjudaginn þar sem GDRN, Magnús Jóhann, Salka Sól, Kalli Olgeirs og DJ Dóra Júlía komu fram.

Edda Björgvins, verndari verkefnisins, og Hrannar Már, formaður Sorgarmiðstöðvarinnar opnuðu viðburðinn með hugvekju. Katrín Sigríður Þorsteinsdóttir Bachmann framkvæmdastjóri 1881 Góðgerðafélags, sem stendur að verkefninu, var í skýjunum með kvöldið.

„Tónleikarnir eru fyrsti liður í fjármögnun til styrktar Listasmiðju fyrir börn í sorg sem er samvinnuverkefni 1881 Góðgerðafélags og Sorgarmiðstöðvarinnar en Edda Björgvins er verndari verkefnisins,“ segir Katrín en Listasmiðjan mun bjóða upp á styðjandi samverustundir þar sem fagaðilar, listamenn og listmeðferðarfræðingar vinna með börnum sem orðið hafa fyrir missi.

Sorgarmiðstöðin miðar að því að auka vitund og skilning samfélagsins á mikilvægi sorgarúrvinnslu og efla aðgengi að faglegri þjónustu við syrgjendur, meðal annars með stuðningi, fræðslu og ráðgjöf til syrgjenda og þeirra sem vinna að velferð þeirra.

Rafmögnuð stemning

„Það var rafmögnuð stemning í lóninu í gærkvöldi. Við hjá 1881 Góðgerðafélagi erum í skýjunum með viðbrögðin við verkefninu og meyr og þakklát öllum þeim sem lögðu söfnuninni lið með því að kaupa miða og eyða kvöldinu með okkur,“ segir Katrín. 

Það var farið að rökkva þegar dagskráin hófst og skapaði það notalega stemningu og létu gestir sem og listamenn rokið ekki á sig fá.

„Sérstakar þakkir fara til allra sem hjálpuðu okkur að standa fyrir þessum einstaka viðburði, Sky Lagoon, tix.is, Sorgarmiðstöðinni, HljóðX og magnaða tónlistarfólkinu sem steig á stokk og skapaði þessa hugljúfu upplifun,“ segir Katrín.