Safnahúsið við Hverfisgötu var þéttskipað þegar Ragnar Jónasson rithöfundur fagnaði útkomu bókar sinnar Hvítalogn. Bankafólk, stjórnmálafólk og rithöfundar voru á meðal gesta en Ragnar er kannski ekki hefðbundinn rithöfundur því hann er lærður lögfræðingur og vinnur í Arion banka. 

Á meðal gesta voru Sigurjón Sighvatsson kvikmyndaframleiðandi, Kamilla Einarsdóttir rithöfundur og ein heitasta einhleypa kona Íslands, Heiðar Guðjónsson fjárfestir, Hannes Hólmsteinn Gissurarson prófessor á eftirlaunum, Þorvaldur Davíð Kristjánsson leikari og Hrafntinna Viktoría Karlsdóttir eiginkona hans sem er lögfræðingur. Víkingur Heiðar Ólafsson píanóleikari mætti með sinni undurfögru eiginkonu Höllu Oddnýju Magnúsdóttur sem var svolítið eins og einkaspæjari með sólgleraugu og í Burberry-frakka. Þar var líka Björn Ingi Hrafnsson ritstjóri Viljans og Katrín Júlíusdóttir fyrrverandi ráðherra ásamt eiginmanni sínum Bjarna Bjarnasyni rithöfundi. 

Hvítalogn fjallar um glæpasagnahöfund sem hverfur en Ragnar sagði frá því í Morgunblaðinu á dögunum að hann sé búinn að vera með bókina í vinnslu í nokkur ár. 

„Hvíta­logn er um glæpa­sagna­höf­und sem hverf­ur, en ég er bú­inn að vera með þessa bók í vinnslu í mörg ár. Ég er að skrifa um þenn­an heim sem ég þekki; bóka­heim­inn og hvernig er að vera rit­höf­und­ur. Þessi ímyndaði rit­höf­und­ur er fræg­asti glæpa­sagna­höf­und­ur þjóðar­inn­ar; kona um sjö­tugt. Hún hverf­ur svo af yf­ir­borði jarðar og það er ung­ur bóka­orm­ur sem fer að leita að henni,“ seg­ir hann og viður­kenn­ir að hann noti eitt­hvað úr eig­in lífi í báðar þess­ar per­són­ur.

Það var svo mikið fjör í boðinu að það þurfti að sópa gestum út líkt og tíðkaðist á Kaffibarnum í gamla daga.