Formleg opnun á sýningunni, Saga VR, sem er ferðamennska sem byggist á sýndarveruleikaupplifun þar sem hægt er að upplifa Ísland úr lofti, var fagnaði í Hörpu á dögunum. Um er að ræða margmiðlunarefni þar sem hægt er að upplifa sjónarhorn fuglsins fljúgandi í 360 gráðum.

Áhorfendur Saga VR sjá til dæmis eldgosið við Fagradalsfjall, Seljalandsfoss, Landmannalaugar, Jökulsárlón á Suðurlandi, Goðafoss, Mývatn, Ásbyrgi á Norðausturlandi og Snæfellsnesið. Leikstjórar og framleiðendur eru Leif Einarsson og Sigurjón Sighvatsson en þeir eru stofnendur Saga VR ásamt Jóhanni Pétri Reyndal og Hafdísi Hreiðarsdóttur sem er framkvæmdastjóri fyrirtækisins.

„Við leituðum nýrra leiða til þess að gefa fólki tækifæri á að upplifa Ísland. Í raun er um að ræða nýja tegund ferðamennsku, sýndarveruleikaferðamennsku eða jafnvel græna ferðamennsku, þar sem markmiðið er að leyfa erlendum ferðamönnum að upplifa landið á einstakan hátt. Við settum upp svokallað „pop up“ rými í Hörpu í sumar og var því afar vel tekið af bæði ferðamönnum og heimamönnum. Harpa er mikið menningarhús og það er ánægjulegt að við höfum nú gert samning um áframhald Saga VR í húsinu,“ segir Sigurjón Sighvatsson sem hefur þróað Saga VR síðan 2016 ásamt Leifi Einarssyni sem hefur starfað í Hollywood í Kaliforníu síðasta áratug. Leifur hefur unnið að þrívíddarmyndun fyrir Warner Brothers og Disney til dæmis X-Men: Days of Future Past, Avengers 2, Spiderman: Homecoming og Antman. 

Við gerð hverrar myndar er notuð 360 gráðu myndavél sem samanstendur af sex linsum sem myndefnið er síðan samsett úr og þannig verður til 360 gráðu þrívíddarupplifun. Eftir töluverða þróunarvinnu og fjárfestingar liggja fyrir nú fjórar myndir þar sem náttúra Íslands er í aðalhlutverki. Telja stofnaðilar að þetta eigi mikið erindi til allra þeirra sem vilja sjá og upplifa Ísland í öðru ljósi. Má einnig segja að þetta sé grænn kostur fyrir þá ferðamenn sem koma hingað til landsins.

„Við höfum heyrt frá ferðamönnum að þeim finnst þetta skemmtileg auka upplifun og hafi þarna tækifæri að sjá það sem eingöngu fuglinn fljúgandi fær að sjá,“ segir Sigurjón.