Erna Bergmann stofnandi Swimslow, sem er íslensk lífsstíls og sundfatamerki, bauð í teiti í draumarými Rvk Ritual við Seljaveg. Teitið fór fram á föstudaginn en Elísabet Blöndal fagnaði stemniguna með einstökum ljósmyndum. 

„Þetta var einskonar þakkarkvöld til velunnara merkisins og nýtti Swimslow tækifærið og kynnti fyrstu vöruna úr sérstakri #afterswim línu merkisins til leiks,“ segir Erna og bætir við: 

„Um er að ræða sérstaklega nærandi og heilandi líkamsolíu sem er fullkomin til notkunar eftir sundferðir, þurrburstun eða gufu-athafnir. Kjarni og skilaboð merkisins er að konum líði vel og hvetur Swimslow konur til þess að næra sig - en það var heldur betur gert á þessu töfrakvöldi. Gestir fengu að smakka sérstakan Eldblóma Elexír sem er hinn íslenski spritz og er hannaður af dansaranum og listakonunni Sigríði Soffíu Níelsdóttur. En einnig kynnti Sigga Soffía sérstakan Eldblóma ilm sem var unninn með listakonunni Lilju Birgis sem er kennd við Fischer,“ segir Erna. 

Veisluborðið skartaði einstaklega fallegum og bragðgóðum forréttum frá veitingastaðnum Nebraska. Dansarinn Þyrí Huld og grænkerinn Hildur Ómars töfruðu fram aðalréttinn sem var meira en girnilegur eða matarmikið spírusalat. Þær aðhyllast báðar lifandi lífstíl og standa fyrir vinsælum spírunámskeiðum. Það var nostrað við hvert smáatriði og fóru veislugestir alsælir heim eftir sannkallaða upplifun fyrir öll skilningarvitin.