Stuttmyndin Þið kannist við... verður frumsýnd á jóladagskvöld á RÚV. Aðstandendur ásamt gestum á öllum aldri tóku forskot á sæluna og fóru á forsýningu myndarinnar í Laugarásbíó í síðustu viku. 

Myndin sem er hryllileg jólakattarstuttmynd fjallar um fjölskyldu sem kemst í hann krappann á jólunum þegar jólakötturinn sjálfur mætir á svæðið í leit að þeim sem ekki fengu föt í jólagjöf. Stuttmyndin er skrifuð af bræðrunum Guðna Líndal og Ævari Þór Benediktssyni, en Guðni er einnig leikstjóri myndarinnar. 

Það mátti varla sjá hvor væri spenntari, foreldrar eða börnin, en eitt er víst að allir komu sáttir út úr salnum að sýningu lokinni. Vafalaust hafa ný föt ratað á einhverja óskalista í kjölfarið.

Meðal aðalhlutverk fara Ævar Þór Benediktsson, Anja Sæberg, Árni Pétur Guðjónsson, Aðalheiður Árnadóttir og Katla María Ómarsdóttir. Leikararnir voru að sjálfsögðu mættir á forsýninguna.