Gleðin var við völd í Borgarleikhúsinu þegar Verzlunarskólablaðið kom út í nítugaseta sinn á föstudaginn var.

„Eftir 9 mánuði af blóði, svita og tárum var loksins komið að deginum sem bæði við í nefnd V90 og nemendur Verzlunarskólans höfðu beðið eftir. Á slaginu 12:00 þann 19. apríl voru dyr Borgarleikhússins opnaðar og Verzlingar hófu kapphlaup um að ná sem bestu sætum fyrir framan stóra svið leikhússins. Það var komið að því að svara stærstu spurningu skólaársins, hvernig kápa nítugasta árgangs Verzlunarskólablaðsins er á litinn. Þétt var setið í troðfullum sal af nemendum, kennurum og fjölskyldumeðlimum nemenda. Salurinn fylltist alveg út að dyrum. Fyrst var sýnt kynningarmyndband á nefndinni sem var svo fylgt eftir með ávarpi ritstýru. Eftir það var komið að því að upplýsa Verzlinga um kápulitinn sem í ár er skær bleikur. Hæstánægðir Verzlingar gengu svo úr salnum sem þar beið þeim tæplega 400 blaðsíðna bók Verzlunarskólablaðsins 90 og pulsuveisla í boði Bæjarins Beztu,“ segir í fréttatilkynningu. 

Um er að ræða 367 blaðsíðna doðrant þar sem innihaldsrík viðtöl og áhugaverðar greinar um lífið í skólanum var gert hátt undir höfði. 

Ingunn Sif Isorena Þórðardóttir ritstýrði blaðinu ásamt átta samnemendum sem heita Eva Sóley Sigsteinsdóttir, Benedikt Björgvinsson, Páll Steinar Guðnason, Katla Karlsdóttir, Hildur Hólm Birkisdóttir, Styrmir Jónsson, Telma Líf Sigurjónsdóttir og Margrét Bára Breiðfjörð Birgisdóttir.

Í Verzlunarskólablaðinu eru ekki bara viðtöl við nemendur skólans heldur þjóðþekkta einstaklinga eins og söngvarann Daníel Ágúst, viðskiptamanninn Björgólf Thor Björgólfsson og Áslaugu Örnu Sigurbjörnsdóttur ráðherra en þau eiga það sameiginlegt að vera fyrrverandi nemendur skólans. 

Stefna nefndarinnar í ár var að beina innihaldi bókarinnar á rétta braut og að leyfa nemendum og félagslífi skólans að skína sínu bjartasta.

Katla Einarsdóttir og Patrekur Björgvinsson sáu um hönnun og umbrot bókarinnar ásamt myndbandi sem var sýnt í Borgarleikhúsinu. Trailerinn var tekinn upp og klipptur af Stefáni Geir Hermannssyni.

Eins og sjá má er líf og fjör í Verzlunarskóla Íslands!