Bókaútgáfan Forlagið bauð til sumarteitis á dögunum og mættu margir af ástsælustu rithöfundum landsins. Þetta sumarteiti fór fram í Bókabúð Forlagsins við Fiskislóð og var skálað í hinum ýmsu drykkjum. 

Hólmfríður Úa Matthíasdóttir útgefandi hjá Forlaginu og Sigþrúður Gunnarsdóttir framkvæmdastjóri Forlagsins léku á als oddi og kom húllahringur við sögu. Eins og sjá má á myndunum var rífandi stemning í boðinu enda gestalistinn upp á tíu. 

Einar Kárason rithöfundur missir ekki af góðu teiti og mætti í bláum gallajakka. Þar voru líka rithöfundahjónin Bragi Ólafsson og Sigrún Pálsdóttir og Halldór Guðmundsson. Ragnhildur Þrastardóttir, blaðamaður og rithöfundur, mætti á partívaktina en hún gaf út sína fyrstu skáldsögu á dögunum, Eyju, sem fjallar um fjölskyldudrama og hversdagsrómantík.

Það er því ekki annað hægt að segja en að fólk á öllum aldri hafi skemmt sér saman og fagnað sumari þótt það sé ekki almennilega byrjað. Allavega ekki í Reykjavík.