Á dögunum var haldið mentoranámskeið í Sykursal Grósku þar sem 55 nýir mentorar hlutu þjálfun. Mentorarnir fengu meðal annars fræðslu um listina að leiðbeina sprotum og fylgdust með mentorafundum í rauntíma. Alls starfa 180 stjórnendur og sérfræðingar víðast hvar úr íslensku atvinnulífi nú sem mentorar hjá KLAK VMS, mentoraþjónustu KLAK - Icelandic Startups. KLAK VMS var stofnað árið 2022 og hefur það að markmiði að  styðja við sprotafyrirtæki í viðskiptahröðlum í umsjón KLAK. 

Sérstakur fulltrúi MIT VMS frá Bandaríkjunum, Jonathan Green, framkvæmdastjóri Arcadia Funds, kom til landsins til að kenna nýjum mentorum handtökin. KLAK VMS er systurprógram MIT VMS í Bandaríkjunum og er byggt á hugmyndafræði MIT VMS sem hefur síðastliðin 25 ár byggt upp mentorakerfi til stuðnings frumkvöðlum innan MIT háskólasamfélagsins í Boston.

Jonathan hefur starfað sem mentor hjá MIT síðustu 20 árin og hefur meira en 35 ára reynslu og þekkingu sem spannar yfir breitt svið háþróaðrar tækni, bæði í þróun vélbúnaðar og hugbúnaðarforrita og viðskiptaþróunar, sérstaklega á sviði markaðssetningar, fjármála og framkvæmdastjórnar. 

„Það er stórkostlegt að sjá hve margir stjórnendur og sérfræðingar úr íslensku atvinnulífi eru tilbúnir að gefa vinnu sína til að styðja við sprotafyrirtæki og árangurinn af starfi KLAK VMS síðustu tvö ár hefur verið ævintýralegur. Það er ljóst að mentoraþjónusta KLAK VMS er í dag með eitt öflugasta teymi mentora á landinu,“ er haft eftir Magnúsi Inga Óskarssyni, forstöðumanni KLAK VMS.