Halla Tómasdóttir, forseti Íslands, og eiginmaður hennar, Björn Skúlason heilsukokkur, létu sig ekki vanta í Smárabíó í gærkvöldi þegar íslenska kvikmyndin Ljósvíkingar var frumsýnd. Björn Jörundur Friðbjörnsson og Arna Magnea Danks leika aðalhlutverk myndarinnar og voru þau að sjálfsögðu líka í Smárabíói í gærkvöldi. 

Myndin fjallar um tvo vini sem reka veitingastað á Ísafirði. Þegar annar þeirra fer í kynleiðréttingu veit hinn ekkert hvernig hann á að haga sér. Gamli skólinn og nýi skólinn mætast á átakanlegan hátt þar sem karlakarlarnir vita ekkert í hvern fótinn þeir eiga að stíga og mannalætin magnast upp.  

Með önnur hlutverk fara Ólafía Hrönn Jónsdóttir, Vigdís Hafliðadóttir, Sara Dögg Ásgeirsdóttir, Sólveig Arnarsdóttir, Helgi Björnsson, Pálmi Gestsson, Gunnar Jónsson og Hjálmar Örn Jóhannsson. 

Snævar Sölvason leikstýrir Ljósvíkingum en hann gerði einnig handrit myndarinnar. Framleiðendur eru Ingvar Þórðarson og Júlíus Kemp. Arndís Ey sá um búningahönnun og Gus Ólafsson um leikmynd. 

Eins og sjá má á myndunum var líf og fjör á frumsýningunni!