Sunneva og Baltasar mættu í bíó

Alþjóðlega kvikmyndahátíðin RIFF var opnuð formlega í gær í Háskólabíó. Fyrir athöfnina sjálfa gafst gestum færi á að spóka sig um í opnu rými bíóhússins, sem nú hefur verið breytt í glæsilegan bar og kaffihús, og skoðað ljósmyndasýningu Lilju Jóns Íslensk veðrátta - Á bakvið tjöldin, en sýningin er haldin í samstarfi við 66° Norður og RIFF.

Myndlistarmaðurinn Sunneva Ása Weisshappel og leikstjórinn Baltasar Kormákur létu sig ekki vanta á RIFF en þau eignuðust dóttur í byrjun ágúst.

Grínistinn Villi Netó var kynnir á athöfninni og hélt uppi rífandi stemningu að sögn viðstaddra. Hann var óskeikull í sínu hlutverki en fór þó örlítið hjá sér þegar Nastjassja Kinski smellti á hann kossi, eftir að hafa tekið við heiðursviðurkenningu fyrir Framúrskarandi listfengi, afhent af Gísla Erni Garðarssyni leikara og leikstjóra fyrir hönd RIFF. Í þakkarræðu sinni talaði Kinski hlýlega til Íslands og lofaði fagra náttúruna og norðurljósin. Hún bætti við að lokum að hún vonaðist eftir að kynnast íslensku kvikmyndagerðarfólki betur á hátíðinni til þess að geta unnið með því í framtíðarverkefnum.

Opnunarmyndir hátíðarinnar voru tvær að þessu sinni, tónlistarmyndin 1000 orð eftir Erlend Sveinsson, sem byggir á nýjustu plötu Birnis og Bríetar og skartaði þeim einnig í aðalhlutverkum, og Elskuleg (Elskling), dramatísk hjónabandssaga eftir norsk-íslenska leikstjórannLilju Ingólfsdóttur.

Eins og sjá má voru nánast allir og amma þeirra í Háskólabíói í gærkvöldi.