KLAK - Icelandic Startups, Nova og Huawei í samstarfi við Grósku héldu lokahóf viðskiptahraðalsins Startup Supernova í bílakjallara Grósku þar sem tónlistardúóið Úlfur Úlfur tryllti lýðinn ásamt DJ Jay-O.

Um 200 manns voru samankomin til að fagna sprotunum tíu, FairGame, GrowthApp, The Gyna App, Jarðargreiningu, Massif.Network, Medvit Health, Neurotic, TAPP, Thorexa og VibEvent, sem höfðu nýlokið sex vikna fjölþættu prógrammi fyrir viðskiptalausnir ætlaðar alþjóðamarkaði.

„Frumkvöðlavegferðin er gífurlega krefjandi og því nauðsynlegt að fagna öllum litlum sigrum á leiðinni. Þess vegna finnst okkur mikilvægt að halda upp á lok viðskiptahraðalsins Startup SuperNova með geggjuðu partýi þar sem við bjóðum öllu frumkvöðlaumhverfinu að fagna með okkur. Við lítum á þetta sem sannkallaða uppskeruhátíð sprotaumhverfisins á Íslandi,” segir Freyr Friðfinnsson, verkefnastjóri Startup SuperNova hjá KLAK - Icelandic Startups.