Áhugafólk um prjónaskap og hannyrðir fjölmennti á fyrsta námskeið í nýrri prjónaseríu íslenska fatahönnunarmerkisins As We Grow á dögunum. Salka Sól Eyfeld, tónlistar- og hannyrðakona, var nemendum innan handar og kenndi þeim réttu handtökin.

Á námskeiðinu, sem haldið var í húsakynnum As We Grow við Klapparstíg 29, voru samankomnir byrjendur með mismikla reynslu. Sumir höfðu byrjað oftar en einu sinni á sömu flíkinni á meðan aðrir höfðu ekki snert prjóna síðan í barnaskóla.

As We Grow mun halda áfram að bjóða upp á ýmiss konar námskeið tengd prjónaskap, bæði fyrir byrjendur og lengra komna. Á döfinni er að kenna nýjum þátttakendum að hanna sitt eigið mynstur, aðlaga og gera við prjónaflíkur, bæði á hefðbundinn máta og með skemmtilegum og skapandi útfærslum.