Það var glatt á hjalla þegar Ragnar Jónasson fagnaði útgáfu nýjustu bókar sinnar Huldu. Hófið var haldið í húsnæði Fossa markaða við Fríkirkjuveg 3. 

Meðal gesta voru fjölmiðlamaðurinn Sigmundur Ernir Rúnarsson, Eliza Reid, fyrrverandi forsetafrú Íslands, og Áslaug Arna Sigurbjörnsdóttir, háskóla-, iðnaðar og nýsköpunarráðherra.

Hulda er forspil að hinum rómaða þríleik Ragnars um lögreglukonuna Huldu Hermannsdóttur, Dimma, Drungi og Mistur. Bækurnar hafa farið sannkallaða sigurför um heiminn og haustið 2024 var frumsýnd sjónvarpsþáttaröð eftir fyrstu bókinni í leikstjórn Lasse Hallström þar sem Lena Olin fer með aðalhlutverkið. Ragnar tileinkar bókina Lasse og Lenu. 

Hugmyndin fæddist við tökur á sjónvarpsþáttaröðinni

Í viðtali við Ragnar sem birtist á síðum Morgunblaðsins á fimmtudag segir hann hugmyndina hafa fæðst þegar hann fylgdist með tökum á sjónvarpsþáttaröðinni.

„Eitt kvöldið horfði ég á Lenu Olin leika á móti Douglas Henshall. Þau léku sama atriðið 20 sinnum, frábæran díalóg, og ég var alveg heillaður. Lena nær henni algerlega, það er inspírerandi að horfa á hana leika. Eftir þetta fór ég heim og hugsaði með mér að ég skuldaði Huldu - og Lenu - að skrifa eina bók til viðbótar um hana.”