Fjölmennt var í útgáfuhófi Forlagsins sem fagnaði útkomu bókarinnar Duna: Saga kvikmyndagerðarkonu eftir þær Guðrúnu Elsu Bragadóttur og Kristínu Svövu Tómasdóttur. Menningarvitarnir Stefán Pálsson og Einar Kárason voru meðal þeirra sem mættu í útgáfuhófið á fimmtudag.

Guðný Halldórsdóttir, jafnan kölluð Duna, er afkastamesta kvikmyndagerðarkona þjóðarinnar. Eftir hana liggja ástsælar gamanmyndir eins og Stella í orlofi en líka dramatískar myndir líkt og Veðramót auk fjölda heimildarmynda og sjónvarpsþátta. Í bókinni hefur Duna sjálf orðið og fer yfir viðburðaríkan feril í sprenghlægilegu en heiðarlegu uppgjöri.